DAVAO DEL SUR- Pagmahay karon ang gibati sa 37-anyos nga suspetsado si Alyas Gene nga midunggab-patay sa 48-anyos niining bana nga giilang si Bernabe Tangug Cañedo, kagahapong adlawa sa Purok Sais, Barangay Tagansule, Malalag, Davao del Sur.
Sa exklusibong pakighinabi sa Bombo Radyo Davao ngadto sa suspek nga si Alyas Gene, wala niini tuyua nga mapatay ang iyahang bana. Pagsaysay pa niini nga dugay na nga nagaselos iyahang bana diin ginadudahan siyang nagabinuang.
Subay sa gihimong imbistigasyon sa kapulisan, nagkalalis sumala pa ang magti-ayon niadtong tungura nga miresulta sa pisikal nga panag-away ug miresulta sa pagpanunggab sa suspek ngadto sa biktima nga iyahang bana nga miresulta sa pagkamatay niini diha-diha dayon.
Sumala pa nga human sa maong panghitabo, gilayon nga mitahan si alyas Gene sa kapulisan sa border control point nga nahimutang sa Sitio Baluyan, Brgy Bolton, Malalag, Davao del Sur. Ning kasamtangan ang maong suspek ang anaa na sa kustodiya sa kapulisan.
via/ DMA
