DAVAO CITY – Kasamtangang nag-antos sa tumang kahuot sa evacuation center ang mga nasunogang residente sa Purok 8-A, Barangay 21-C, Piapi Boulevard, Davao City human niulbo ang dagkong kalayo sa mga kabalayan pasado ala-una sa udto kagahapon.
Gilunop sa maong kalayo ang mga kabalayan nga gama lamang sa mga light materials.
Sa halapad nga pagkatag niini nga gika-alarma sab sa mga kasikbit nga barangay, gihakot na sa mga residente ang ilang mga gamit ug ilabi nang gisalbar ang ilang kaugalingon ug pamilya.
Nagtabang-tabang na sab ang mga residente ug firefighters gikan sa ubang mga fire stations sa dakbayan aron nga mapalong ang kalayo.
Apan nahimong maayong butang ang nahitabong pag-ulan aron mapadali ang trabahuon sa mga bumbero nga nagresponde sa lugar.
Sumala sa Bureau and Fire Protetction Davao, nasa 1,200 ka mga kabalayan ang gilamoy sa kalayo nga muabot na sa kapin P9 million pesos ang damyos niini.
Subay sa imbestigasyon, nagsugod ang maong sunog sa balay sa usa ka Ricky Gera Gantalao apan wala pa masayod sa hinungdan sa sunog.
Gideklarang fire out ang insidente bandang alas-3:49 sa hapon.
via || Bombo LJF
