DAVAO CITY – Tutukan sumala pa sa bag-ong napahimutang nga PNP Provincial Director sa Davao del Norte ang sunod-sunod nga patay sa nahisgutang probinsya.
Sa pakighinabi sa Bombo Radyo, gikanayon ni Police Col. Ranie Hachuela nga mohimo siya ug case review sa tanang mga pagpamatay sa Tagum city aron masuta kung unsa gayud ang tinuod nga motibo sa mga suspek.
Dugang pa ni Hachuela nga wala usab niya gisalikway ang posibilidad nga adunay kalabutan sa mga investment scam sa Tagum city ang sunod-sunod nga mga pagpamatay sa nahisgutang syudad.
Hinuon tutukan nila ang tanan nga mga posibleng motibo ug hinungdan sa krimen sa Tagum city.
Usa sa mga plano sumala pa ni Col. Hachuela ang pag-deploy sa mga office personnel lakip na mga station commander isip kabahin sa pagpalapad pa sa Police initiated operation ug pagpakgang sa kriminalidad.
Kahinumduman nga gipahigayon kagahapong adlawa ang turn over of office ceremony diin gihulipan niini si Police Col. Ferly Silvio.
Nasayran nga si Hachuela ang hepe sa Regular Intelligence Division sa Police Regional Office 12.
