Wala misuporta ang Palasyo sa Malacañang sa panawagan nga usbon ang Batakang Balaod nga gisugyot ni House Minority Leader ug 4Ps Representative Marcelino Libanan.
Sumala ni Palace Press Officer USec. Claire Castro, mas importante karon ang kausaban sa batasan ug kasingkasing sa mga opisyal sa gobyerno kaysa pag-usab sa Konstitusyon.
Gipasiugda ni Castro nga dili uyon si Presidente Ferdinand Marcos Jr. sa panawagan alang sa Constitutional Change.
Matod niya, dili ang pagbag-o sa Batakang Balaod ang solusyon, kundi ang pagpakita sa pagka-maka-Pilipino ug pagka-maka-nasud sa mga lider.
Gibuhat ni Castro ang maong pahayag isip tubag sa panawagan ni Rep. Libanan ug ni Senator Alan Peter Cayetano nga magpahigayon og snap election isip paagi sa pagsulbad sa mga isyu sa nasud.
Dugang pa niya, aduna pay ubang mga balaod nga magamit aron masulbad ang mga problema sa nasud kung sundon lang kini sa mga opisyal sa gobyerno.
