Gipahibalo ni Finance Secretary Ralph Recto nga ang subsidy sa gobyerno sa PhilHealth mahimong ibalik sa 2026, human kini mawagtang uban ang dugang pondo karong tuiga.
Matod ni Recto, P53.26 bilyones ang gisugyot nga subsidy sa PhilHealth sunod tuig, 28.44% nga mas ubos sa P74.43 bilyones nga gisugyot sa miaging tuig alang sa 2025, apan gitangtang kini sa Bicameral Conference Committee human nasuta nga P280.575 bilyones ang reserbang pondo sa PhilHealth.
Sa pagkakaron ang PhilHealth nakabayad na og P145.36 bilyones sa benefit claims niadtong Hunyo ning tuiga, halos doble sa P76.89 bilyones sa samang panahon sa miaging tuig.
Bisan pa sa zero subsidy, gipasalig ni Fund Management Sector Senior Vice Renato Limsiaco Jr. nga makapundo gihapon ang PhilHealth sa mas lapad nga benepisyo niini.
Dugang ni Recto nga palig-onon sa gobyerno ang serbisyo sa panglawas ug balay tambalanan sa DOH ilabi na sa mga probinsiya nga nagkuwang pa ang mga tambalanan.
Dugang pa, gitumong usab sa gobyerno ang zero-balance billing, apil na ang mga specialty hospitals.Giklaro usab ni Recto nga walay plano nga dugangan ang kontribusyon sa mga sakop sa PhilHealth sunod tuig.
Kahinumdoman nga ang DOF nimando sa PhilHealth nga ibalhin ang P89.9 bilyones ngadto sa National Treasury, sanglit ang ilang reserbang pundo milapas sa P500 bilyones.
Apan human sa pagsaway sa nagkadaiyang sektor ug sa TRO gikan sa Korte Suprema, P60 bilyones ra ang gibalhin sa PhilHealth.
