DAVAO CITY – Gisugdan na paghisgot sa nanag-iya sa luna diin nahimutang ang airport sa Mati City, Davao Oriental aron nga mahan-ay ang isyu sa donation aron nga makapadayon sa operasyon ang maong tugpahanan.
Subay sa nahipus nga impormasyon gikan sa buhatan sa Mati City, laraw ni Davao Oriental Gov. Nelson L. Dayanghirang nga sulbaron ang isyu ilabi na bahin sa Rocamora family kung ila bang ibaligya ang portion sa luna aron nga mapalapdan pa ang airport runway aron nga maakomodar ang mga dagko pa nga eroplano.
Nasayran nga ang Rocamora family ang usa sa mga nanag-iya ingon man Pamilyang Rabat hinungdan nga usa si Mayor Mary Michelle Denise N. Rabat sa mga mitambong sa tigom.
Sumala pa sa Mayor, suportado niya ang subling pag-abli sa airport ilabi na nga ang iyang amahan sumala pa ang nagpatukod niini kaniadtong 1970s.
Kahinumduman nga una ng nagmugna si Dayanghirang ug grupo nga motabang sa subling pag-abli sa airport ug gimandoan ang Department of Tourism nga mogahin ug P200 million alang sa rehabilitasyon.
