DAVAO CITY – Gipasabot ni city building official Engr. Grace Catubig nga mas maayo sumala pa nga mohimo na lamang ug inisyatibo ang mga nanag-iya ug gambalay sa siyudad nga mokuha ug kaugalingon nga structural engineer aron nga mosubay kung pabilin pa ba nga lig-on ang ilang mga gambalay ug kung luwas pa kini sa ilang mga empleyado.
Kahinumduman nga gidagsa na ug request ang maong ahensiya aron nga ipasubay sa ilang civil ug structural engineer ang mga gambalay sa dakbayan human ang ulahing kusog nga pagtay-og niining milabay nga adlaw nga posibleng nakapasamot sa mga liki-liki.
Gitataw ni Catubig nga dili tanan hangyo ilang maakomodar sanglit dili sab sumala pa igo ang ilang personahe aron nga atimanon ang mga nahisgutan.
Mas maayo sumala pa nga adunay kaugalingon nga Civil ug structural engineer ang mga nanag-iya og gambalay aron nga makapahigayon gilayon og inspeksiyon ug kung kinahanglan ba nga ikumpuni gilayon ang mga apektado nga gambalay ilabi na nga sunod-sunod na sab ang natalang pagtay-og sa siyudad.
Responsabilidad sab sumala pa sa mga building owners ug contractor ang pagpahigayon ug hugtanong inspection.
