DAVAO REGION-
Nagpagawas na og opisyal nga pamahayag ang Mayor sa Sta. Cruz, Davao del Sur nga si Mayor Nelson Sala kalabot sa bag-uhay lamang nga pagkasikop sa usa ka Chinese National nga matud pa migamit og peke nga birth certificate nga gi-isyu sa Local Civil Registry Office sa LGU Santa Cruz, Davao del Sur.
Kahinumdumang nasikop sa National Bureau of Investigation – Southeastern Mindanao Research Office kon NBI-SEMRO ang usa ka Chinese National nga sumala pa nameke og mga dokumento susama sa PSA, Drivers License ug National ID niadtong milabayng adlaw.
Ang maong chinese national ang adunay filipino name nga Hengson Limosnero Jabilles, 21 anyos nga residente sa Purok 4, Suazo extension, barangay 14-B ning dakbayan sa dabaw.
Sumala pa ni Mayor Sala nga bisan pa man wala pa silay nadawatang opisyal nga impormasyon, komunikasyon o detalye gikan sa NBI kalaabot sa maong isyu, gisiguro gayud niini nga commited sila sa pag kooperate sa ilahang imbestigasyon ilabi pa og kalabot kini sa record sa ilahang local civil registry.
Nakapatik sa maong pamahayag nga wala gayud nila gina-tolerate ang maong iligal nga transaksyon ubos sa administrasyon sa maong alkalde. Gani, pamatuod niini, aduna na usab silay ginabuhat nga susamang imbestigasyon ug aduna usab matud pa silay mga initial nga lakang kalabot niini.
Misaad usab kini nga ginabuhat gayud sa lokal nga panggamhanan ang tanan aron masiguro nga mupatigbabaw gayud ang balaod.
