DAVAO CITY – Napuno sa maampuong kahilom ang tibuok Sta. Ana Elementary School nga gipadangat alang sa nitaliwan nilang estudyante nga si Shienjilyn Bangcas, 9 anyos, usa ka Grade 4 student nga nakabsan sa kinabuhi human sa duguong aksidente sa Quezon Boulevard, Agdao, Davao City, niadtong Setyembre 28 sa hapon.
Dungan nga naghatag og pag-ampo ang tanang magtutungha ug mga magtutudlo sa maong iskwelahan alang sa ilang classmate ug schoolmate nga si Shienjilyn nga dili na nila makit-an pa ug ilang gikamingawan pag-ayo.
Sa pakighinabi sa Bombo Radyo Davao ngadto kang Minnie Empasis, ang principal sa maong tulunghaan, iyang gikabutyag nga hugot ang ilang implementasyon sa pagpasundo alang sa mga estudyante nga anaa sa lower levels apan alang sa higher level sama sa Grade 4 to 6, anaa sa diskresyon sa mga ginikanan kon sunduon pa ang ilang mga anak gikan sa iskwelahan.
Sa kaso ni Shienjilyn, sumala sa tigdumala, ginasundo siya sa iyang amahan matag dismissal apan niadtong tungura, gisaysay sa amahan nga muuli kini sa iyang panimalay human siya gihapit sa usa ka establisyemento duol sa tulunghaan, apan human sa pipila ka minuto, didto na nahitabo ang pagkabangga sa bus ni Shienjilyn pagtabok niini sa pedestrial lane.
Samtang sa San Pedro Police Station, masulub-on ug matinud-anong nagpadayan sa pagbasol ang drayber sa pampasaherong bus nga nakaligis-patay sa 9 anyos nga si Shienjilyn Bangcas nga giilang si Efren Cerona.
Ekslusibong gipahayag ngadto sa Bombo Radyo Davao nga hinay ang iyang padagan niadtong panahona apan tungod usab sa multicab nga nakatabon sa pagtabok sa bata, wala niya nabantayan nga nakatabok na sa pedestrial lane si Shienjilyn ayha pa man kini naligsan ug nalatayan ang naglinghod nga lawas sa bata sa dagkong ligid sa pampasaherong bus nga iyang gimaneho.
Gilimod sab sa drayber nga paspas kini nagpadagan sa iyang bus niadting tungura. Sumala sab sa drayber, karon lamang kini nahitabo sa iyaha sukad sa pipila ka katuigan nga nagmaneho.
Hinuon, taliwala pa man sa pagpangayo og pasaylo ni Cerona sa maong panghitabo, pursigidong nipasaka og kaso ang pamilya sa biktima og Reckless Imprudence Resulting to Homicide ngadto sa piskalya kagahapon.
Sumala pa ni Police Major Marvin Hugos, Hepe sa San Pedro Police, wala pay settlement nga nahitabo tali sa bus company ug pamilya sa biktima nga wala nakadawat sa kamatayon sa kamatayon ni Shienjilyn.
Gipasalig sab sa nahisgutan nga makig-alayon kini sa mga baranggay aron nga malikayan ang susamang insidente ug ingon man gisiguro niini nga bantayan kining mga pedestrian lanes nga sakop sa iyang AOR aron malikayan ang susamang panghitabo.
via || Bombo ME & Bombo LJF
