DAVAO CITY – Nanawagan ang Southern Philippines Medical Center (SPMC) ngadto sa mga Local Government Units (LGU) nga kuhaon dayon ang ilang mga residente nga naka-recover na sa covid 19.
Gi-angkon ni SPMC officer in charge Ricardo Audan, nga gawas sa nagka-taas nga kaso sa covid 19 patients nga ilang gina-atiman, nahimong problema na usab nila karon ang dugay nga pagsundo sa mga nagmaayong mga pasyente.
Sumala pa ni Audan, niadtong milabay nga semana aduna silay 3 ka mga pasyente nga dugay kaayu gisundao sa ilang LGU sa katarungan nga mokuha lamang kini ug naka-recover nga pasyente kung aduna usay ihatud nga bag-o laing lain na usab nga covid 19 positive patient sa ilang lugar.
Dugang pa ni Audan nga kinahanglan usab nga masabtan sa ubang mga LGU nga gawas sa SPMC naa pay laing ospital sa gobyerno nga mao ang Davao Regional Medical Center sa tagum city nga mamahimong usab modawat ug mga covid related cases.
Subay sa datus nga gipagawas sa DRMC hangtud Oct. 15, 2020 aduna kini 25 active covid cases sa ilang ward beds o 17.48% occupancy rate ug nagpabiling bakante ang 15 ka ICU beds alang sa covid 19 patients.
Samtang sa SPMC naa na sa 93.3% ang ICU occupancy rate sa covid 19 ug 90.25% usab ang ilang occupancy sa ward beds.
