DAVAO CITY – Mihatag og katin-awan ang Southern Philippines Medical Center (SPMC) nga wala sumala pay kamatuoran ang matud pa kaso sa Coronavirus Disease (COVID-19) dinhi sulod sa rehiyon sa Davao.
Gipagula sa SPMC ang maong pahayag aron nga ipahibalo sa publiko nga sayop ang mikatag sa social media mahitungod sa usa ka foreign national nga una matud pang nagdumili sa pagpatambal ug pagpa-quarantine.
Ang nahisgutang langyaw ang miabot matud pa dinhi sa dakbayan sa Davao Marso 2 diin gikan kini sa nasud nga adunay kaso sa COVID-19.
Ang nasangpit ang nakitaan og sintomas kaniadtong Marso 5 lamang. Sumala kang Dr. Leopoldo Vega, chief of hospital sa SPMC, anaa na karon sa isolation facility sa SPMC ang maong foreign national human nga nagpacheck up kini sa usa ka private hospital.
Sa karon, usa na lang ang person under investigation (PUI) ang anaa karon sa SPMC nga padayon pang gina-obserbaran ug padayon pa sab nga ginahulat ang resulta sa test niini.
Hugot nga nanawagan karon ang Department of Health sa publiko nga magpabiling makinalmahon ug likayan ang pagpakatag og sayop nga impormasyon.
Subay niini, gipasalig usab sa mga hingtungdang ahensya ning syudad nga andam sila sa bisan unsa mang bahad nga dala sa Coronavirus Disease-2019.
Gikanayon sab ni Vega nga kanunay nga andam ang ospital ilabi na ang ilang mga kagamitan ug mga lawak nga gitagana alang sa mga gidudahang adunay sintomas o dili ba kaha natakbuyan sa COVID-19.
Gipasalig karon sa mga eksperto nga dili angayang mabalaka ang katawhan gumikan nagpabiling luwas ang dakbayan gikan sa maong balatian.
