DAVAO CITY – Gisiguro karon sa opisyal sa Southern Philippines Medical Center (SPMC) ngadto sa publiko nga gipahugtan nila karon ang ilang mga lakang aron nga batukan ang 2019 novel Coronavirus (2019-nCoV) ilabi na kung makasulod kini sa siyudad.
Sumala pa kang SPMC Chief of Clinics and Health Emergency Management Bureau (HEMB) coordinator Dr. Ricardo Audan, sa kasamtangan ang SPMC mao ang pinakadakong hospital sa Mindanao ug andam na sila sa higayon nga mokalit ang pagsaka sa ihap sa kaso ilabi na karon nga padayon sab nga misaka ang ihap sa mga nasud nga apektado sa 2019-nCoV.
Hinuon sa kasamtangan, wala pay gika-report ang DOH nga adunay Chinese national nga misulod sa nasud nga infected sa makamatay nga fatal virus nga daling makatakod sa uban.
Sa Asya, pipila ka mga nasud na ang nakatala og positibo nga kaso sa coronavirus nga gilangkuban sa Republic of South Korea, Thailand, Japan, Singapore, Malaysia ug Vietnam.
Ang 2019-nCoV mao ang bag-o nga virus nga nagsugod sa Wuhan City, Hubei Province sa China.
