DAVAO CITY – Karon pa lang daan, gi-atangan na sa katawhang Filipino ang pinaka-unang State of the Nation Address (SONA) ni Pangulong Ferdinand “Bongbong” Marcos Jr. nga ipahigayon eksaktong alas 4 unyang hapon sa Batasang Pambansa Complex sa Quezon City.
Usa sa paga-atangan sa publiko mao ang kung unsa ang mamahimong plano ni PBBM alang sa Pilipinas ug alang sa katawhang Pilipino sa sunod nga unom ka tuig niini nga pagpangatundanan isip pangulo.
Kahinumduman, mao kini ang pinaka-unang full face-to-face SONA nga mahitabo sa Batasan human ang SONA ni kanhi Pangulong Rodrigo Duterte niadtong pang 2019 sa dihang wala pa nahitabo ang COVID-19 pandemic sa nasud.
Human sa SONA, musunod ang joint session sa House of Representatives ug Senate sa plenary hall sa Batasang Pambansa.
Gawas sa pamilya ug suod nga higala ni PBBM, lakip sab sa mga imbitado mao ang mga kanhi pangulo sa nasud ug mga foreign dignitaries.
Liboan ka mga pulis ug sundalo ang una nang gipakatag sa nagkadaiyang bahin sa Metro Manila isip kabahin sa seguridad sa SONA.
Gawas niini, magpatuman sab og jam sa mobile phone signal pipila ka oras ayha sugdan sa pangulo ang paghatud sa iyang speech.
Unsa ba ang inyong gustong madungog sa una nga SONA ni PBBM mga Ka-Bombo?
