Dili na mag-serve ug ramen o instant noodle soup ang Korean Airline gumikan kay delikado kining makapaso sa higayong adunay turbulence.
Matod pa sa Korean Air, sukad niadtong Agusto 15, wala na sila mihatag ug instant noodles sa Economy class passengers aron malikayan ang burn accident sa higayong mag-uyog uyog ang eroplano.
Masabwagan ang mga pasahero ug init nga tubig sa instant noodles sa higayong mag-uyog na ang eroplano gumikan sa turbulence.
Ang turbulence mao ang dili regular nga paglihok sa hangin nga sagad masinati-an sa naglupad nga eroplano.
Kini gumikan sa mga nagkadaiyang hinungdan lakip na ang pagbag-o sa kapaspas ug direksyon sa hangin, adunay mga bukid ug uban pang mga babag lakip na ang pag-usab sa temperatura sa hangin.
Matod pa sa Korean Air, midoble ang kaso sa turbulence ning tuig 2024 kung ikumpara sa tuig 2019.
