DAVAO CITY – Napalgan kilid sa dalan ang mga sinako nga guano deposits sa Brgy. Casoon, Monkayo, Davao de Oro. Subay sa imbestigasyon sa CENRO sa DENR 11, nagagikan ang mga narekober nga mga deposito sa Combilan Cave nga makit-an sa Purok 6, Barangay Casoon.
Ang ilegal nga pagpanguha sa susamang deposito, dunay katugbang nga silot ilawom sa Republic Act No. 9072 kon National Caves and Cave Resources Management and Protection Act.
Ang masakpang nagabuhat niini, mag-atubang ug duha ka tuig nga pagkapriso ug multang mubalor sa P20,000.
Gilapas sab ang Republic Act No. 7942 kon Philippine Mining Act Of 1995, ug ang Department Administrative Order No. 2010-21 nga magmando sa pagdiskubre, paggamit ug pagpanalipod sa mga deposito.
Ang DENR lamang ang gitugotang magbantay sa mga kweba busa dili mamahimo sa pagpahigayon ug extraction sa mga cave resources nga walay pagtugot gikan sa buhatan.
Samtang, pahugtan pa sa ahensya ang pagpahinumdum sa katawhan mahitungod sa maong mga balaod.
Ang guano, usa ka waste product gikan sa mga langgam nga nagapuyo sa mga kweba ug kasagarang ginahimo kining sangkap sa fertilizer tungod sa maayong sustansya nga hatud niini sa mga pananum.
via || Bombo LJ Florendo
