DAVAO CITY – Dakong tabang sumala pa ang gipahigayon nga simulation exercise kagahapong adlawa sa may San Pedro St. ning dakbayan aron nga masigurong andam ang mga nagkadaiyang security forces nga moresponde panahon nga adunay buot mosabotahe atol sa Kadayawan Festival nga magsugod na ang pag-abli karong adlaw nga Biyernes.
Nasulayan ang katakos sa otoridad dihang nagpahigayon sila ug scenario nga adunay terorista nga nagtanom ug bomba ug kung paunsa kini gi-respondehan.
Namatikdan ni Police Brig. General Marcelo Morales, regional director sa Police Regional Office (PRO) 11 nga dali lamang naka-responde ang mga sakop sa otoridad sa nahisgutan ng scenario nga usa sa mga maayong lakang nga angayan nga himuon sa otoridad aron nga malikayan ang casualty.
Samtang nanawagan sab si Public Safety and Security Command Center (PSSCC) head Angel Sumagaysay sa publiko nga tabangan ang mga security forces sa pagbantay sa palibot aron nga masiguro ang seguridad.
