DAVAO CITY- Nahimong malampuson ang gipahigayong Security Simulation Exercise (Simex) sa security and safety cluster sa syudad kagahapong adlawa sa Davao City National High School.
Muabot sa 222 ka mga personahe ang gipang-deploy diin gilangkuban kini sa Davao City Police Office, Task Force (TF) Davao, Public Safety Security Command Center (PSSCC), Central 911, Bureau of Fire Protection, City Disaster Risk Reduction and Management Office ug uban pang ahensya.
Muabot sab sa 20 ka mga units sa mobility assets sa syudad sama sa bombero, ambulansya, rescue trucks ug uban pa ang gipang-deploy sa area.
Nasayran nga ang gipahigayong simex kagahapon maoy pinakadugay human nga milungtad sulod sa duha ka oras ang pagpahigayon niini gikan alas 3 sa hapon hangtud alas singko.
Gikanayon ni Col. Darren Comia, Commander sa TF Davao, nga sa kinatibuk-an, nahimong malampuson ang maong simulation exercise.
Nagpasalamat sab kini sa mga teaching staff ug estudyante sa nahisgutang tulonghaan alang sa ilang partisipasyon.
Dugang pa ni Comia nga daghan pang mga simulation exercises ang ipahigayon sa umaabot aron nga mahimong “muscle memory” sa security forces sa syudad ingon man sa katawhan niini ang saktong tubag sa security crisis nga posibleng masagubang sa dakbayan.
Sa pikas bahin, gikanayon ni PCol. Angel Sumagaysay, hepe sa PSSCC, nga ang maong execution sa security cluster sa syudad ang gihatagan og score nga 7.5 to 8 out of 10.
