DAVAO CITY – Aprubado na sa lokal nga panggamhanan ang pagsilot sa mga malapason o makasupak sa physical distancing.
Kini ang usa sa mga lakang karon sa panggamhanan sa Davao aron kapugngan ang paspas nga pagkuyanap sa COVID-19.
Kahinumdoman nga kaniadtong milabay nga bulan sa Agosto, gimando ni Mayor Inday Sara Duterte Carpio sa mga kapulisan nga magdala og usa ka meter stick nga sukdanan aron masiguro nga nagatuman sa physical distancing ang katawhan.
Apan, aduna gihapoy mga masinupakon sa maong lakang.
Gani, subay sa datos sugod kaniadtong Marso 15 hangtud Nobyembre 26, mikabat na sa 2,473 ang mga nadakpan gumikan sa wala pagtuman sa social distancing.
Gumikan sa nagkataas nga ihap sa mga nasikop, mas gipanghingusgan ni 19th Davao City Council Committee on Health Chairperson Councilor Mary Joselle Villafuerte ang pagduso sa Physical Distancing Ordinance o ang istriktong implementasyon sa physical distancing sa mga pampublikong lugar ug silotan ang musupak niini.
Samtang, aduna sab silot ang mga establisyemento kung musupak sa maong lakang kung diin maka multa kini og P5,000 ug usa ka tuig nga suspension sa business permit sa first offense lakip na niini ang mga government offices.
