DAVAO CITY – Pahamtangan ug silot kadtong mga tawo nga makalapas sa sanitation code sa dakbayan sa dabaw pinaagi sa pag-isyu ug citation ticket.
Ang nahisgutang kamanduan ang kabahin sa gipagawas nga Executive order no. 33 series of 2019 nga gipirmahan ni Acting Mayor Sebastian “Baste” Duterte niadtong Agosto 5.
Subay niini, gimanduan ang tanang mga barangay nga padayong i-monitor ang ilang tagsa-tagsa ka mga dapit ug ipatuman ang pagpahamtang ug multa batok sa mga nakasupak sa waste management and segregation ordinances.
Samtang, gimanduan usab sa Bise Mayor ang matag barangay nga magmugna ug Barangay Mosquito-Borne Viral Disease Task Force.
Nag-una nga trabaho sa task force mao ang pagpahigayon ug regular vector surveillance sa matag purok.
Kinahanglan sumala pa nga mo-sumiter ang matag usa kanila ug report labot sa ilang tagsa-tagsa ka mga health districts matag bulan.
Ang task force ang langkuban sa City Social Services and Development Office, City Information Office, Liga ng mga Barangay, Barangay Cultural and Community Affairs Division, mga Barangay, City Cooperative and Development Office, City Legal Office, Ancillary Services Unit, City Environment and Natural Resources Office, City Transport and Traffic Management Office, City Disaster Risk Reduction and Management Office, City Engineer’s Office, Business Bureau, ug Public Safety and Security Command Center.
