DAVAO CITY – Gihatagan pa karon ug tsansa sa lokal nga kagamhanan ang mga sidewalk vendors nga mangunay sa pagpangguba sa gitukod nga estraktura ayha pormal nga sugdan ang demolisyon sa dili madugay.
Sa pakighinabi sa Bombo Radyo, gikanayon ni Paul Bermejo, ang hepe sa Ancillary Services Unit (ASU) nga karong semanaha ipagawas na nila ang notice of demolition alang sa pang-apud-apod na usab niini sa tanang mga sidewalk vendors sa syudad.
Dugang pa ni Bermejo nga gitakdang managtagbo ang ASU, City Engineers Office, City Legal Office ug ang CTTMO alang sa hapsay ug malinawon nga pagpatuman sa halapad nga demolisyon.
Hinoon, gitin-aw ni Bermejo nga dili apil sa demolition order kadtong mga vendors nga gitugutan sa lokal nga kagamhanan alang sa one-third/two-third policy niini.
Human madawat ang notice, hatagan sumala pa ug usaka semana ang mga vendors aron sila na ang boluntrayong moguba sa ilang gitukod nga mga estraktura.
Gawas sa mga sidewalk vendors, apilon usab sa pag-demolish sa ASU ang mga junkshop ug mga vulcanizing shops nga migamit na sa sidewalk sa ilang operasyon.
