DAVAO CITY – Gikumpirma ni Police Regional Office 11 Regional Director Brig. Gen. Alden Delvo nga nagsugod na ang Senate Sargeant at Arms kauban ang team sa NBI 11, PRO 11, DCPO ug CIDG 11 sa pagpangita kang Pastor Apollo Quiboloy.
Kini human niabot sila dinhi niadtong Lunes sa Davao City aron ihatud ang order of arrest for contempt batok kang Quiboloy.
Gipadayag ni Delvo nga tumong sa team nga balikan ang nangaging mga dapit nga gituohang gitagoan sa wanted nga lider sa KOJC apil na niini ang iyang Kingdom sa Buhangin, Prayer Mountain sa Tamayong Calinan, ug ang iyang property sa Island Garden City of Samal.
Dugang ni Delvo nga iyang gipalihok ang tanang sakop sa intelligence community aron sa pagtino sa gitagoan ni Quiboloy.
Giangkon ni General Delvo nga isip sakop sa kapolisan ug usa ka Dabawenyo, dugay na niyang kaila si Quiboloy diin gani magsaulog siya sa iyang adlawng natawhan karong Abril 25.
Bisan pa niana, gisiguro ni General Delvo nga mopatigbabaw ang iyang propesyonalismo sa pagpatuman sa iyang katungdanan sa katawhan.
Sa pikas bahin, giangkon sa hepe sa Police Regional Office 11 nga usa ka hagit karon ang pagpangita kang Quiboloy.
Sumala pa ni Delvo, tungod kana sa halapad nga network sa mga higala ug logistics ni Quiboloy hinungdan nga naglisod ang mga otoridad sa pagdakop kaniya.
Gigamit ni Quiboloy ang mga pribadong jet, lakip ang usa ka Cessna Citation Sovereign private jet, nga gihimo sa Hawaii kaniadtong 2018 human nakit-an ang mga tapok sa salapi ug mga piyesa sa pusil sa eroplano. Dili daw matud pa gipanag-iyahan sa televangelist ang pribadong eroplano, nga nagkantidad ug labing menos $15 milyon, apan giparentahan kini.
Matod ni Delvo nga manubag usab ang si kinsa mosuway pagtago kang Quiboloy gikan sa mga imbestigador ug mga tigpatuman sa iyang warrant of arrest.
Dugang pa, walay reward money nga madawat alang ni bisan kinsa nga makatudlo sa kataposang nahimutangan ni Quiboloy apan posibleng mapatuman ang citizen’s arrest.
Giangkon usab sa PNP nga dili armado ug delikado si Quiboloy bisan og tag-iya kini og napulog siyam ka armas, ang pastor wala makonsiderar nga “armed and dangerous” sa kapolisan.
Kahinumduman nga nakigtagbo ang Office of the Sergeant-at-Arms (OSA) sa Senado sa mga opisyal gikan sa Davao City Police Office, PRO-11, NBI SEMRO, 1003rd Infantry Brigade, CIDG, ug Task Force Davao nga hisgotan ang pagsilbi sa arrest order sa Senado batok kang Quiboloy.
Gikompirmar ni Delvo nga ang mga opisyal sa OSA, pinangulohan nila ni Director III Manny Parlade ug Director II Gil Valdez, nagpabilin sa siyudad ug motabang sa pagpangita sa nahimutangan ni Quiboloy.
Duha ka warrant of arrest ang giluwatan batok kang Quiboloy: ang contempt warrant sa Senado tungod sa wala pagtunga sa mga committee hearing nga gihimo sa Committee on Women, Children, Family and Gender Equality; ug ang Regional Trial Court tungod sa giingong paglapas sa Republic Act. 7610 o ang “Special Protection of Children Against Abuse, Exploitation and Discrimination Act.”
