Nanawagan ang Malakanyang sa Senado nga paminawon ang panawagan sa business community nga dali-on ang impeachment trial ni VP Sara Duterte aron magpabiling lig-on ang ekonomiya ug pagsalig sa mga investors nga mamuhunan sa nasud.
Gipahayag ni Palace Press Officer USec. Claire Castro, mismong mga anaa sa business sector ang naalarma sa paglangan sa impeachment trial, hinungdan nga angay aksyunan na kini sa Senado.
Gipahayag pa ni Castro nga dili gusto sa mga investor nga mag-invest ug negosyo sa nasud kung ang usa ka lider ang gi-akusahan ug korapsyon ug daw gidapigan pa sa pipila ka senator judges.
Gipanghimakak usab niini ang nahimong pahayag ni VP Sara nga bagsak ang ekonomiya sa Pilipinas. Matod pa niini nga nagmaayo karon ang dagan sa ekonomiya sa nasud.
Dakong tabang niini ang pagtanggal sa Pilipinas sa grey list sa Financial Action Task Force nga mao ang mihatag ug hataas nga investor confidence.
Gibida usab ni Castro ang report sa Asian Development Bank (ADB) nga na-maintain sa Pilipinas ang maayong economic outlook sa nasud alang sa tuig 2025.
Gipahayag pa ni Usec Castro nga wala nanghilabot si pangulong Marcos sa impeachment process sa Senado. Apan gusto lamang sa pangulo nga sundon sa senado ang konstitusyon ug ang rule of law sa impeachment.
