DAVAO CITY – Gikakurat ni Senador Ronald `Bato’ Dela Rosa ang pagkalambigit ni kanhi Presidential Security Group (PSG) chief Brig. Gen. Jesus Durante III sa pagpusil-patay sa negosyante ug modelo nga si Yvonette Chua Plaza.
Nag-atubang si Durante og kasong murder lakip na ang unom pa ka mga sundalo nga nalambigit sa pagpatay kang Yvonne niadtong Disyembre 28, 2022.
Matud pa ni Bato nga nakurat siya gumikan nasayod kini nga si Durante usa ka one-star general ug gisugal lamang niini ang career ug kaugmaon sa iyang pamilya gumikan lamang sa usa ka babae.
Sama ni Durante, nagsilbi sab si Bato sa administrasyon sa kanhing pangulong Rodrigo Duterte isip hepe sa Philippine National Police.
Sa pikas bahin, gipanghimakak sab sa kanhi PSG chief nga nalambigit kini sa pagpatay kang Plaza.
Tambag karon ni Dela Rosa ilabi na sa mga nalambigit sa susamang problema, dili lamang mga unipormadong awtoridad, nga dili mangbabae.
