DAVAO CITY- Napaguwa na usab og katin-awan si Senador Bong Go kabahin sa nikatag na nga balita sa pagpanaw ni kanhi President Rodrigo Duterte.
Sa gipadayag nga post sa senador sa social media, gipakita niini ang litrato ni Digong kung asa naglingkod ug nagkaon kini sa lamesa uban sa caption nga “alive and eating”.
Kauban sa kanhi pangulo ang partner niining si Honeylet Avanceña samtang nagkaon kini sa lamesa.
Kabahin niini, gipaghimakak sa opisyal ang nikatag nga balita nga nakabsan na sa kinabuhi si FPRRD.
Kahinumduman nga nakaani og daghanang reaksyon sa social media ang pagbaktas sa pangulo samtang anaa kini sa entablado nga daw naglisod na atol sa pinakaulahi niining gi-attendan nga Maisug Prayer Rally.
Sa nakalabay nga bulan usab, niguwa ang susamang balita nga pagpanaw sa kanhi pangulo apan gitagaan kini og tubag sa nailang suod nga higala ni FPRRD nga si Senador Bong Go.
Subli sab kining nagpahimangno sa publiko nga likayan ang pagpakatag og sayop nga impormasyon hilabi pa nga dili gayud mamahimong kataw-anan ang pagpanaw sa bisan kinsa mang indibidwal hilabi na kung wala kini kamatuoran.
Dugay nang problema ang pagpakatag og balita sa mga pagpanaw sa iladong indibidwal diin daghanang mga artista na ang nabiktima niini.
