DAVAO CITY – “All sytems go” na ang security and safety cluster sa syudad alang sa Undas 2022.
Kini mismo ang gikumpirma ni Angel Sumagaysay, hepe sa Public Safety and Security Command Center (PSSCC), diin nagpahigayon na og mga panagpulong ang PSSCC alang sa OPLAN Kalag-kalag ug andam na usab nga ipang-deploy ang mga sakop niini.
Sa pikas bahin, gikumpirma sab ni Sumagaysay nga walay ipatuman nga closure sa mga sementeryo sa dakbayan karong tuiga.
Muabot sa 13,870 ka mga personahe ang ipang-deploy sugod Oktubre 30 hangtud Nobyembre 3 diin 1,692 niini ang i-deploy sa Oktubre 30; 3, 422 ang ipakatag sa Oktubre 31; 3,602 ang magbantay sa Nobyembre 1; 3,602 alang sa Nobyembre 2; ug 1,552 ang ipang-deploy sa Nobyembre 3 sa 35 ka mga sementeryo ning syudad.
Lakip sab sa maghatag og seguridad ang 27th Infantry Batallion, 89th IB, ug 56th IB diin hugot kining magbantay sa District 2, Paquibato District, Marilog District, ug pipila ka bahin sa Toril.
Giklaro sa opisyal nga walay direktiba nga sirad-an ang mga sam-ang karong tuiga dili susama sa nakalabay nga tuig sa dihang gipangsira ang mga sementeryo gikan Oktubre 24 hangtud Nobyembre 7, 2021.
