DAVAO CITY – Abli sumala pa ang security officers nga ilakip ang uban nga parte sa siyudad sa maximum security zones apan ilang gisugyot nga tutukan lamang una ang San Pedro Square isip first spot sa dakbayan.
Sumala pa kang Task Force Davao (TFD) commander Col. Consolito Yecla nga human gi-aprubahan sa City Council ang rekomendasyon sa committee on peace and public safety nga ideklara ang San Pedro Square isip maximum security zone karong panahon sa Kadayawan festival, gisugyot sab karon sa mga konsehal ang pagpalapad pa sa highly-secured places sa siyudad human ang gipahigayon nga pilot testing atol sa Indak-Indak sa Kadalanan sa milabay nga sabado.
Sakop sa Maximum Security Zone ang backpacks, jackets, non-transparent water containers, non-transparent garbage bins, shrubs ug daghanan pa.
Adunay gisugyot sab nga ideklara ang Roxas Street, partikular na ang Roxas Night Market isip maximum security zone tungod sa pagdagsa sa mga bisita matag gabii.
Kahinumduman nga anaa sa 15 katao ang namatay samtang 70 ang angol sa nahitabong pagpamonba sa Roxas Night Market kaniadtong Setyembre 2, 2016.
Sukad sa nahisgutan nga panahon, hugtanon na nga gibantayan sa mga operatiba sa TFD ug Davao City Police Office (DCPO) ang night market ug ginadili na ang pagdala ug backpacks ug uban pang delikado nga butang.
Gitino sab ni Yecla nga ang pagpatuman sa maximum security zone kinahanglan nga “very specific per area”. Kahinumduman nga sa San Pedro Square ginapahigayon ang mga mahinungdanon nga aktibidad sa kagamhanan ug nahimutang sab sa maong dapit ang mga mahinungdanon nag establisyemento sama sa City Hall, City Council, San Pedro Cathedral, Rizal Park, Osmena Park, Quezon Park ug Centennial Park.
