DAVAO CITY – Nagpulong-pulong ang tanang security forces sa Tagum City alang sa alang sa hugot nga pagtutok sa seguridad sa mga barangay.
Nunot kana sa nahimong hagit ni Davao del Norte Governor Edwin Jubahib human sa nahitabong sunod-sunod nga kamatayon sa duha ka babaye sa syudad sa nakalabay nang mga adlaw.
Nakighinabi si Tagum City Mayor Rey Uy ngadto sa mga sakop sa punong barangay, Civil Security Unit, Traffic Management Unit, ug pipila ka mga personahe sa Philippine National Police diin direktang gimanduan ni Mayor Uy ang mga barangay captain nga i-mobilize ug pakusgan ang presensya sa mga barangay tanod ug peacekeepers aron masiguro nga luwas ang tanang dapit sa siyudad.
Kauban ang TMU, gimanduan sab ni Mayor ang mga kapitan nga awhagon ang mga asosasyon sa mga habal-habal nga driver nga magpalista ug magpaila aron masiguro ang kaluwasan sa mga commuter.
Lakip sa prayoridad ni Mayor ang pagpakusog sa mga presensya sa CSU ug TMU personnel sa mga eskwelahan aron maproteksyunan ang mga Tagumenyong estudyante gikan sa ilang pagsulod sa eskwelahan hangtod sa ilang pag-uli.
Kahinumdumang, gihagit sa Provincial Government sa Davao del Norte ang City Government of Tagum nga gilayon aksyonan ug magpatuman og realistic security measures aron mapugngan ang kriminalidad sa syudad.
via || Bombo LJF
