DAVAO CITY – Gipahimangnoan sa Securities and Exchange Commission (SEC) ang publiko nga magbinantayon ayha mo-invest sa Unlishop E-commerce Advertising System Company nga usa ka online marketplace.
Nagpagula ug pahimangno ang ahensiya human nga nakadawat ug impormasyon kalabot sa Unlishop nga nag-awhag sa publiko nga mag-invest pinaagi sa pagbaligya ug online account codes ug mo-recruit ug uban nga indibidwal nga mo-apil sa investment scheme.
Gikanayong ang nahisgutan nga kompanya naka-rehistro isip partnership sa usa ka Hector John Hemady Dollero ug Ryan Guerrero Hemady nga nag-operate ug negosyo sa buying, selling, advertising sa produkto pinagai sa online services o sa internet.
Apan gitino sa SEC nga dili otorisado ang mga nahisgutan nga mag-solicit ug investments sa publiko gumikan kay wala kini gihuptan nga lisensiya.
Pipila sa mga nahipus nga impormasyon sa SEC sa maong investment scheme gilangkuban sa pagpalit sa mga recruiter ug activation code nga kantidad sa P1,000 matag account; pagdawat ug P1,000 isip welcome one-time reward ; pag-download sa one e-book matag adlaw nga maximum sa napulo ka adlaw, mokolekta ug P1,000; direct ug indirect referral bonus; ingon man profit-sharing.
