DAVAO CITY – Padayon ang gihimong imbestigasyon sa kapolisan sa Malalag, Davao del Sur may kalabotan sa pagpamusil alas 8:20 ang takna kagabii sa Purok 2, Barangay Bolton, Malalag, Davao del Sur.
Duha ka mga menor de edad ang gipamusil sa riding in tandem.
Naila ang mga biktima nga sila si Argie Mansingil Anday, 17 anyos, wala na magtungha ug si Majorie Dedeos Baquil, 17 anyos, dalaga, residente sa sitio Lumbia, Barangay Poblacion sakop sa lungsod sa Malalag, Davao del Sur.
Nasayran sa imbestigasyon sa kapolisan nga ang nahisgutan nga mga biktima misuroy sa pinoy-anan sa usa ka Alberto Libay, Purok 2, Barangay Bolton, Malalag, Davao del Sur.
Nasayran nga usa ka wala maila nga suspek nga sakay ug motorsiklo ang mi-abot sa pinoy-anan sa usa ka Alberto Libay ug gipusil si Argie Anday nga naigo sa likod nga bahin ug milapus ang bala sa iyang dughan.
Ang nahisgutan nga bala miigo sa wala nga tiil nga bahin sa usa ka Marjorie hinongdan nga ang duha ka mga biktima maayo nga pagkahagba sa nahisgutan nga dapit.
Ang wala maila nga suspek dali nga miikyas palayo sa dapit.
Dali sab nga gitabang ang duha ka mga biktima ug gipangdala sa Golingay Hospital sa lungsod sa Malalag, apan gumikan sa talandugon ang kahimtang gipangdala sa Davao del Sur Provincial Hospital.
Si Argie Anday gibalhin sab dayon sa Southern Philippines Medical Center (SPMC). Mihimo gilayon ug hugtanon nga imbestigasyon ang kapolisan sa Malalag, Davao del Sur.
Sa crime scene narecover ang baseyo sa kwarenta y singko nga pestola ug usa ka nalumping nga balinis.
Sumala sa kapolisan nga ang tumong lamang gayud sa suspek mao ang usa ka Argie Anday.
Wala pa maila ang mga mamumuno.
