DAVAO REGION- Paga-ablihan na karong umaabot nga Hunyo 1, 2024, adlawng sabado, ang anaa sa 10 ka ektarya nga Sanitary Landfill Facility nga nahimutang sa Purok 3, Sitio Sta. Cruz, Brgy. Nueva Fuerza, Tagum City,Davao del Norte.
Ang maong pagbuhat sa 10 ka ektarya nga pasilidad mao ang tubag sa hagbay rang gimado nga RA 9003 o ang ‘Ecological Solid Waste Management Act of 2000’ alang sa saktong paglabay ug pagproseso sa mga basura sa matag lokalidad.
Gipasundayag sa lokal nga panggamhanan sa syudad sa Tagum nga ang maong pasilidad ang adunay kapasidad nga kapin 100 tonilada nga basura diin mao kini ang kasagarang matapok sa syudad matag adlaw.
Dugang pa niini nga environment friendly usab ang maong pasilidad tungod sa ginatawag nga proseso nga “leachate treatment” diin dili na makontaminate ang tubig nga anaa ilawom sa yuta gikan sa duga sa basura.
Bisan pa man niini, subli gihapong nanawagan ang City Enviroment and Natural Resources Office kon CENRO nga ipadayon gihapon ang sakto nga pagsegregate sa basura sa tagsa-tagsa nga panimalay aron mamahimong hapsay ang pagkolekta niini gikan sa matag barangay.
