Luyo sa bag-ong sa gipagula nga mga guidelines sa lokal nga kagamhanan sa dakbayan sa Dabaw nga dili una moapil o motambong sa mga panimbahon, prayer meetings, ug uban pang religious activities aron sa malikayan ang pagkuyanap sa corona virus (COVID-19), gibutyag ni Parochial Vicar sa San Pedro Cathedral nga si Fr. Voltaire Dimol nga walay pay gipakanaog nga guidelines ang arsobispo nga si Archbishop Romullo Valles mahitungod sa mga aktibidad sa simbahan labi na sa panahon sa Semana Santa taliwala sa hulga sa maong sakit.
Sumala ni Father Dimol nga kasamtangang nagpaabot pa sila sa kamanduan gikan sa arsobispo ug kung duna nay kamanduan gisiguro niini nga ang mapadangat gilayon kini gikan sa Parokya ngadto sa mga Gagmayng Kristohanong Katilingban kun GKK.
Gipaklaro usab sa opisyal nga walay kanselasyon sa mga regular mass ug magpadayon kini hangtod karon gumikan wala na sumala pay laing kadoulan ang mga tao ning panahon sa kahadlok ug kalibog kung dili ang pagduol ug pagbalik sa Labaw nga Makagagahom.
Sumala ni Fr. Dimol nga niadtong bag-o pa mibutho ang maong virus sa tibook kalibutan, mas midaghan matod pa ang katawhan nga nagasimba kung diin gidagsa na karon sa mga debotong Katoliko ang San Pedro Cathedral panahon sa mga panimbahon.
Dugang pa ni Fr. Dimol nga andam sila makig-alayon ug kung unsay usab mahimong tabang sa simbahan mahitungod sa maong mga guidelines sa dakbayan kung diin duna sab silay ginahimo nga pagdisinfect ug paglikay sa virus sulod sa cathedral ug gipanawagan usab niini ang hiniusang pag-ampo sa tanang katawhan.
