Gipasalig ni Pangulong Ferdinand Marcos Jr. nga paningkamotan sa gobyerno nga bayloan ug balos ang matinud-anong pagserbisyo ug sakripisyo sa mga trabahante nga giisip nga haligi ug pundasyon sa katilingban , dili lamang dinhi sa Pilipinas apan lakip usab sa ubang nasud.
Sa iyang pamulong atol sa pagsaulog sa ika-123 nga Adlaw sa mga Mamumuo (Labor Day), gihatagan og gibug-aton sa Pangulo nga buhaton sa gobyerno ang tanang posible aron masuklian ang sakripisyo sa mga mamumuo.
Matud sa Pangulo, naningkamot ang administrasyon nga maghimo og disente ug makatawhanong mga trabaho aron mapaayo ang kalidad sa kinabuhi sa matag trabahante, katawhan, ug pamilya sa Pilipinas.
Aron mas daghan pang trabaho ang mamugna, gipadaghan sa gobyerno ang mga mamumuhunan o investors nga mosulod sa nasud.
Gipasigarbo usab sa Pangulo nga sukad sa tuig 2022 hangtod sa miaging tuig, misaka na sa $27 billion ang kantidad sa mga foreign investments nga misulod sa Pilipinas, diin kapin sa P4 trilyon ang natala sa mga Investment Promotion Agencies.
Gilauman nga kini nga mga kompanya magmugna og 352,000 nga trabaho alang sa mga Pilipino.
Gipasiugda usab sa Pangulo nga tungod sa kusog nga ekonomiya, nakaangkon ang Pilipinas sa labing ubos nga unemployment rate sulod sa 20 ka tuig sa miaging tuig.
Padayon usab ang kauswag sa kahimtang sa labor market, tungod niadtong Pebrero ning-ubos sa 3.8 porsyento ang unemployment rate.
Bisan pa niana, gipasalig sa Pangulo nga dili moundang ang gobyerno sa pagpaningkamot sa paghimo og mas daghang oportunidad para sa trabaho.
