DAVAO CITY – Gikanayon ni Davao City Mayor Inday Sara Duterte-Carpio nga ang cockfighting derby sa New Davao Matina Gallera, nga nahimong “ground zero” tungod sa coronavirus disease (Covid-19) outbreak sa Davao City ang napugngan unta sa division chief sa Business Permit and Licensing Division (BPLD) ning siyudad.
Sumala sa Mayor, ang nahisgutan nga division chief, nga wala niya gihinganlan, ang mamahimo unta nga makapugong sa pagpahigayon ug sabong aron nga malikayan ang sitwasyon ug dili mosaka ang kaso sa mga nagpositibo sa virus.
Subay sa resulta sa imbestigasyon sa City Mayor’s Office, gitugtan sumala pa sa BPLD ang pag-isyu ug permit sa New Davao Matina Gallera management alang sa naka-schedule nga derby kaniadtong Marso 7, 10, 12 ug 14.
Apan kung sa legal ang basehan, wala sumala pa nakasupak ang derby organizer ug BPLC sa pagpahigayon ug sabong sa nahisgutan nga mga adlaw.
Gani ang derby organizers ang nakakuha ug resolusyon gikan sa 19th City Council nga usa sa rekisitos aron mapahigayon ang maong aktibidad.
Apan mamahimo unta sumala pa nga dili ihinayon ang maong sabong ilabi na nga tulo ka adlaw human nga gi-aprubahan ang maong resolusyon, nagpagula sab ang Department of Health (DOH) ug advisory nga nag-awhag sa publiko nga likayan ang pagsalmut sa maong aktibidad apan ubay-ubay ang mitambong.
Nasayran nga ang nahisgutan nga sabong wala nahilakip sa kanselasyon sanglit dili sumala pa kini official Araw event inay nga usa kini private event.
Samtang una ng gibutyag sa Department of Health-Regional Epidemiology and Surveillance Unit (DOH-Resu) sa Davao Region chief Dr. Cleofe Tabada nga ila ng gisubay karon ang kapin 400 ka mga indibidwal nga na-expose sa New Davao Matina Gallera sa Matina, ning siyudad human nga 12 ka mga sabongero ang kumpirmado nga positibo sa coronavirus disease (Covid-19).
