DAVAO CITY – Bisan tuod nga ubay-ubay ang midagsa sa Roxas Night Market kapin usa ka semana sukad kini nga gi-ablihan sa publiko, wala sumala pa nakatala ang Covid-19 Task Force ug pagsaka sa kaso sa mga Covid cases dinhi sa dakbayan.
Sumala pa kang Dr. Michelle Schlosser, tigpamaba sa Davao City Covid-19 Task Force, bisan kamatikdan ang daghanang tawo sa lugar gituman sa mga nahisgutan ang kanunay nga pagsuot ug facemask nga usa mga mahinungdanon nga lakang ilabi na nga nagpabilin pa karon ang bahad sa Covid-19.
Subay sumala pa sa data, wala nahimong gigikanan sa infection ang subli nga pag-abli sa Roxas Night market.
Mahinungdanon matud pa nga bisan nga lifted na ang social distancing ilalom sa gipagula nga EO sa lokal nga kagamhanan, mahinungdanon matud pa nga ipabilin lamang ang pagsuot ug facemask.
Gawas niini, hugtanon sab ang pagmonitor sa otoridad sa lugar ug gani ubay-ubay na sab ang na-isyuhan ug citation tickets gumikan sa wala pagsuot ug facemask.
Sa kasamtangan, mikabat na matud pa sa 1.3 million ka mga dabawenyos ang nabakunahan apan gipahinumduman niini ang mga fully vaccinated nga dili kini igo gumikan kay kinahanglan pa gihapon nga magpa-booster shot arun nga makaangkon ug dugang nga layer sa proteksiyon batok sa kagaw.
Una na sab nga gibutyag sa opisyal nga sa kasamtangan, napabilin sa siyudad ang very low positivity rate sa Covid-19.
Kahinumduman nga nagpabilin karun ang dakbayan sa Alert Level 1 sugod kaniadtong Abril 1 hangtud 15, 2022 kauban ang lugar sa Montevista sa Davao de Oro, ug Cateel ingon man Mati City sa Davao Oriental.
