DAVAO CITY – Nag-atubang na ug kaso ang isa ka 22 anyos nga roomboy nga gikanayong nangmolestiya sa 21 anyos nga iyang kaubanan sa trabaho sa usa ka inn sa Quimpo Boulevard ning dakbayan sa Davao niining milabay nga adlaw.
Naila ang suspek nga si Rico Hamisula Silma nga taga Lamba, Marilog District nga nag-atubang na karon ug kasong kalapasan sa Republic Act 8353 (Anti-Rape law).
Kasamtangan nga gibalhug karon ang nahisgutan sa Talomo Police Precinct samtang gihulat nga maresolba ni Prosecutor Joy C. Bernales-Largo ang iyang kaso nga gi-atubang.
Subay sa reklamo, natulog sumala pa ang biktima sa usa ka lawak dihang nakamata kini bandang 5:00 sa kaadlawon human nga aduna sumala pay misulod.
Kalit sumala pa nga gibira ang iyang kamut ni Silma ug nahitabo na matud pa ang pagpang-molestiya kaniya.
Human ang insidente, miadto sumala pa siya sa Sandawa police outpost pasado alas otso sa buntag aron nga i-report ang insidente.
Gi-ubanan sumala pa sa Police officers pabalik sa inn ang biktima ug miduol pa kanila si Silma.
Apan gitudlo kini sa dalaga nga maoy nangmolestiya kaniya hinungdan nga gidala kini sa kapulisan.
Gidala sab sa Southern Philippines Medical Center ang biktima alang sa medical report, nga magsilbi sab isip ebidensiya batok sa suspek. Sa imbestigasyon kang Silma sa Women and Children’s Protection Desk sa Talomo police, mi-angkon kini sa iyang salaud nga nahimo.
