DAVAO CITY – Muhatag og reward ang lokal nga kagamhanan sa Tagum alang sa mga makahatag og impormasyon sa pag-ila sa mga suspek sa sunod-sunod nga pagpamatay sa nahisgutang syudad.
Una na nga mipagawas og Statement of Condemnation ang lokal nga kagamahanan sa Tagum subay sa nagapanghitabong pagpamatay sa syudad sukad pa niadtong milabayng mga bulan kung diin ang pinakaulahi nahitabo kagabii lamang kung diin patay ang usa ka Judylou Palas, 22 anyos, lumulupyo sa Purok Dahlia, Barangay Visayan Village, Tagum City ug anak sa usa ka agent sa PLC investment scheme.
Subay sa gipagawas nga opisyal nga pamahayag sa lokal nga kagamhanan sa Tagum, usa matud pa ka barbaric o dili makatao ug tinalawan ang pagpatay sa mga inosenteng sibilyan.
Nanawagan sab sa Tagum City Police Office ang kagamhanan nga sigurohon nga ang mga mamumuno sa nahisgutang krimen, dali dayun nga madakpan ug mabilanggo bugti sa mga bug-at nga krimen nga ilang gihimo.
Dugang pa niini, nanawagan sab sa publiko ang lokal nga kagamhanan sa Tagum nga mag-amping ug mahimong alerto ug makig-alayon sa mga otoridad kung adunay mamatikdang mga katahapan.
