DAVAO CITY – Miubos na matud pa ang mga nadawat nga reklamo sa Kean Gabriel hotline nga usa sumala pa nga maayong senyales.
Sumala pa kang Davao City Social Services and Development Office (CSSDO) head Maria Luisa Bermudo nga sa milabay nga mga bulan, ubos ang reklamo nga natala kini tungod sa malampuson nga kampanya sa lokal nga kagamhanan.
Gitataw ni Bermudo nga pinaagi sa pagpaningkamut sa lokal nga panggamhanan sama sa koordinasyon sa barangay, nagmalampuson sumala pa ang dakbayan sa kampanya batok child abuse.
Sa tuig 2018, nakadawat sumala pa ug 456 ka tawag ang Kean Gabriel hotline.
Apan sukad Enero hangtud Oktubre ning kasamtangan nga tuig anaa na lamang sa 94.
Gitumbok ni Bermudo ang pagpaningkamut sa barangay pinaagi sa pagmugna ug mga nagkadaiyang programa nga tumong ang pagprotekta sa mga bata batok pagpangabuso.
Ang Kean Gabriel hotline gimugna ni Mayor Sara Duterte ug gipangalan sa tres anyos nga batang lalaki nga namatay tungod sa pagpangabuso sa iyang ama-ama.
