DAVAO CITY – Gikanayon ni Atty. Enrique Bunucan, City legal officer nga usa na lamang karon ka ahensiya ang mamahimong adtuan sa mga adunay reklamo batok sa mga empleyado sa lokal nga panggamhanan partikular na sa City hall.
Tipik lamang ang pahayag sa nahisgutan human ang kamugnaan sa Investigating committee pinasikad sa gipagula nga Executive Order (EO) 06 series of 2017.
Gitataw sa nahisgutan nga daghanan na matud pa sila ug nadawat nga reklamo diin karung tuig 2017 lamang, gihuptan nila ang 50 ka kaso diin sagad niini kadtong mga empleyado sa kagamhanan nga nagmani-obra sa ilang attendance o daily Time Record (DTR) nga giilang usa ka grave offense sa higayon nga mapamatud-an sa ilang salaud nga nahimo.
Nasayran nga kaniadtong panahon pa ni kanhi Mayor ug karon Pangulong Rodrigo Duterte namugna ang investigating committee apan nahunong lamang human nga nahimo kining Presidente sa nasud.
Sa panahon ni Pangulong Duterte, anaa sa napulo ka mga empleyado ang gitaktak sa katungdanan tungod sa mga hiwing binuhatan.
Nasayran nga bugtong reklamo lamang batok sa mga plantilla employees ang i-akomodar sa maong buhatan.
Sagad sumala pa sa mga gireklamo mao kadtong mga personahe sa City Treasurer’s Office (CTO) nga nag-atubang ug kasong administratibo gumikan sa dili tukma nga paggamit sa kwarta o pondo.
