DAVAO CITY – Nipasiugda ang Davao City Ancillary Services Unit ug Davao City Engineer’s Office og preparatory procedures alang sa rehabilitasyon sa mga drainage sa mga lugar sa dakbayan nga ilabihang mabahaan.
Gikanayon ni Paul Bermejo, ang nangulo sa Ancillary Services Unit, naka-deploy na ang mga sakop sa ASU ug City Engineer’s Office alang sa pag-assess sa functionality sa reinforced concrete cylinder pipes sa mga drainage aron mahibal-an ang gidaghanon sa trabaho ug kagamitan nga gikinahanglan sa pag-desilt niini.
Magtipig sab ang mga opisina og imbentaryo sa mga kasamtangan nga RCCPs aron mahibal-an kung kini nahiuyon sa mga bag-ong agianan sa tubig nga gibutang sa mga bag-ong proyekto gikan sa Department of Public Works and Highways (DPWH).
Mupahigayon sab ang buhatan og rodding assessments sa mga drainage pinaagi sa mga batch sa lima ka mga lugar hangtod masusi ang tanang mga flood prone areas sa dakbayan.
Tulo ka mga team gikan sa ASU ang gipakatap diin duha ang naglihok sa adlaw ug usa sa gabii.
Dugang ni Bermejo nga desidido ang mga buhatan sa pag-repair sa mga agianan sa tubig sa labing dali nga panahon, ilabi nang nagsagunson ang pag-ulan.
Iyang giawhag ang tanang Dabawenyo nga tabangan ang kagamhanan sa dakbayan sa pagsulbad sa problema pinaagi sa paglabay sa ilang mga basura sa hustong paagi ug pagsunod sa Solid Waste Management Ordinance sa dakbayan aron malikayan ang paglabay sa basura sa kanal, suba, ug kadagatan.
via || Bombo LJF
