DAVAO CITY – Gi-awhag ni Davao City councilor Danilo Dayanghirang ang mosunod nga City Council nga hatagan ug prayoridad ang re-routing scheme aron nga masolusyonan ang suliran sa trapiko dinhi sa dakbayan.
Sumala pa kang Dayanghirang, chair sa committee on finance, ways and means, kinahanglan nga iduso sa iyang mga kaubanan ang bag-ong traffic ordinance alang sa re-routing.
Kini human nga ang bypass road project nga ilalom sa supervision sa Department of Public Works and Highways (DPWH) ang target nga matapos sa tuig 2021.
Sa kasamtangan, nanawagan ang re-elected councilor sa tanan nga mga pribadong subdivisions nga tugtan nga makalatas ang mga sakyanan sa ilang areas.
Kahinumduman nga nasinatian karon ang grabe nga trapiko ilabi na sa downtown areas gumikan sa nagpadayon nga Underground Electrical Distribution System (UEDS) sa Davao Light and Power Company (DLPC) diin tumong niini nga malubong sa ilalom sa yuta ang mga linya sa kuryente nga nagbitay sa mga kadalanan sa dakbayan.
Gitataw sab ni Dayanghirang nga makiglambigit sila sa executive department aron nga maduso ang kamugnaan sa bag-ong bus terminal, sa North ug South bound terminal ug target kini nga ipatuman sa Toril ug Panacan ning siyudad.
