Naangkon sa usa ka tinun-an gikan sa Davao Medical School Foundation ang rank 1 sa mga Top Notchers subay sa gipaguwa nga resulta sa Physician Licensure Examination karong adlawa.
Giila ang tinun-an nga si Isaac Edron Jones Orig nga residente sa Sandawa Phase 2, Kidapawan City nga karon hingpit na nga usa ka Doktor human sa 89.33% nga rating.
Nasayran nga si Orig, usa ka Registered Medical Technologist (RMT) nga nahimo sab nga kabahin sa topnotcher niadtong 2019 isip rank 7 pinaagi sa rating nga 89.40%.
Naila na si Orig sa pagka-utukan tungod sa iyahang pagtungha sa high school nahimo kining Class Valedictorian, Summa Cum laude sa Bachelor in Medical Laboratory Science sa San Pedro College ug Cum Laude sa gikuha nga kusro nga Doctor of Medicine.
Subay sa gipaguwa nga resulta sa Professional Regulation Commission (PRC) karong adlawa, adunay kinatibuk-an nga 6,600 examinees, apan 3,845 lamang ang nakapasar sa October 2024 Physician Licensure Examination.
Samtang sa laing bahin, adunay lima usab ka mga migradwar dinhi sa dakbayan nga mga tulunghaan ang nahimong kabahin sa topnotchers kini subay sa gipaguwa nga resulta sa October 2024, Optometrist Licensure Examination.
Ang lima ka mga tinun-an ang naila nga sila Carlos Joe Corales Sedeño,Rank-2 nga gikan sa Mindanao Medical Foundation College nga adunay 88.85% nga rating, anaa sab sa Rank-3 si Chris Thomas Wee Ravelo gikan sa Davao Doctors College nga adunay 88.63% nga rating, Jeriah Betil Liong, Rank-4 nga gikan sa Mindanao Medical Foundation College nga adunay 88.54% nga rating, Rank-5 si Sophia Nicole Medellin sa Davao Doctors College nga adunay 88.27% nga rating ug Jerome Acosta Puna, Rank-7 gikan sa Davao Doctors College nga adunay rating nga 88.09%.
Sumala pa sa Professional Regulations Commission (PRC), adunay 327 examinees apan 297 lamang ang nakapasar sa eksaminasyon.
