Nahilakip sa partial list sa COMELEC si KOJC leader Pastor Apollo Quiboloy sa mamahimong magpapili isip senador alang sa 2025 midterm elections.
Gibutyag ni COMELEC Chairman, Atty. George Garcia nga nahilakip sumala pa ang pangalan ni Pastor Quiboloy sa 66 ka mga indibidwal nga nahimong kwalipikadong mudagan og pagka-senador alang sa umalabot nga piniliay.
Kahinumdumang anaa sa 180 ka mga indibidwal ang miduso sa ilahang kandidatura alang sa pagka senador.
Ang mga COC sab sumala pa niini, maoy miagi sa hingpit nga deliberasyon sa COMELEC Law Department ug kinatibuk-ang COMELEC en banc.
Kahinumduman usab nga miduso kini si Pastor Quiboloy sa iyahang kandidatura niadtong katapusang adlaw sa filing sa Certificate of Candidacy diin magpapili kini isip pagka-senador alang sa umalabot nga 2025 Midterm Election.
Daghan ang natingala ug mitaas ang kilay, gumikan usab sa mga isyu ug mga kasong ginaatubang sa maong pastor labot sa human trafficking, child ug sexual abuse, ug uban pa.
Apan daghan sab sumala pa ang nalipay gumikan mao sumala pa kini ang kapamaagihan aron nga mapamatud-an nga sayop ang mga gipanglabay nga mga akusasyon batok kang Pastor Quiboloy, diin ang tao na gayud ang muhukom og angayan ba kining pilion isip musunod nga tigpanday og balaod o dili.
