DAVAO CITY – Hingpit nang ipatuman sa bulan sa Nobyemren ang QR Code system sa tibuok dakbayan alang sa tanang mga residente niini.
Kini ang gibutyag ni Davao City Mayor Inday Sara Duterte Carpio karong adlawa lamang.
Sumala pa ni Mayor Inday Sara, kasamtangan plastada na ang tanan ug gina-develope na ang ipatumang sistema ug posibling mga upat ka semana gikan karong adlawa, ipatuman na kini dinhi sa syudad.
Gikatarungan sa Mayor nga tumong sa QR Code nga ma-subay ang lihok sa katawhan, ug masayran kung asa nga mga lugar kini mi-adto aron mamahimong sayon ug paspas ang himuon nga contact tracing sa higayon nga magbaton ug mga positibong kaso sa covid 19.
Mag-agad sumala pa sa mga opisina ug mga departamento sa syudad ang kalampusan sa pagpatuman sa sistema sanglit mandatory na ang pag-scan sa QR code sa mga naghupot niini matag higayon nga mosulod sa usaka establisamento.
Tapukon sa QR Code ang tanang mga data sulod sa 14 ka adlaw nga mga kalihukan sa usaka indibiiduwal. Dugang pa ni Mayor Inday Sara, subli siyang mopagawas ug executive order sa dili pa pormal nga ipatuman ang QR Code system sa dakbayan sa Dabaw.
