DAVAO CITY- Patay ang usa ka babae human nga gipusil kini sa iyahang kaipon nga pulis kaganihang kaadlawon sa Purok San Miguel, Monseda Compound, Brgy Indangan, ning dakbayan sa Davao.
Subay sa report Mandug PNP, nahitabo ang pagpamusil pasado ala-una ang takan sa kaadlawon.
Naila ang biktima nga si Justine May Villaroja, hamtong ang panuigon nga residente sa Dumanlas, Brgy Buhangin, ning dakbayan sa Davao.
Samtang ang suspek ang giila nga si Patrolman Alvin John Tayamin, hamtong ang panuigon, aktibo nga PNP member ug kasamtangang nga nadestino sa PS13 Mandug Police Station nga residente sa Kidapawan, North Cotabato.
Sa gihimong imbistigasyon sa kapulisan nasayran nga nag-inom ang mga nahisgutan niadtong higayuna apan niabot sa punto nga nagkalalis ang duha sa wala masayri nga hinungdan samtang ang suspek nagbitbit kini sa iyahang giisyu nga pistola ug gipusil ang biktima tumong sa nawong nga maoy hinungdan sa pagkahagba niini ug gilayon nga nakabsan sa kinabuhi.
Samtang human sa maong panghitabo, boluntaryo sumala kining mitahan sa iyahang kaugalingon sa iyahang mga kaubanang pulis sa Mandug PNP.
Makita sa hulagway sa lawas sa bikima nga nagkahugaw ug yuta o balas nga usa kini sa mga imbistigahan sa kapulisan kung unsa pa ang nahitabo sa wala pa ang pagpamusil.
Narekober sa crimescene ang 9mm Taurus nga adunay serial number nga TMR02481, nga adunay dusi ka mga bala.
Ang patay nga lawas sa biktima ang anaa na sa purenarya sa Rivera, Sasa ning dakbayan sa Davao.
Samtang ang pulis nga suspek ang gokustudiya na sa Mandug PNP ug giandam na ang kaso batok niini.
