Nanawagan si House Committee on Overseas Workers Affairs Chairman Jude Acidre sa publiko nga maghinuklog kon mamalandong og maayo ug mag-analisa sa mga pahayag si kanhi DA Sec. Manny Piñol, ilabi na nga kaniadto siya ang nangulo sa ahensya sa nakalabay nga administrasyon sa panahon nga nisaka ang presyo sa bugas ngadto sa P70 matag kilo.
Matod ni Acidre, niadtong Setyembre 2018 misugod ang krisis sa bugas nga usa ka dakong hagit sa ekonomiya sa nasud. Bag-ohay lang, gibatikos ni Piñol nga kandidato karon isip gobernador sa North Cotabato ang administrasyong Marcos nga adunay kalabotan sa P16.63 trilyon nga utang sa nasud. Apan sumala pa ni Acidre, wala gibutyag ni Piñol nga ang administrasyon ni kanhi Pangulong Duterte, diin siya mismo nagsilbi isip Kalihim sa Agrikultura, maoy nakautang sa labing dako nga kantidad, nga maoy hinungdan nganong nisaka ang utang sa nasud sa P16.63 trilyon, apan iyahang gipasa ang tanan nga sala sa kasamtangang administrasyong Marcos.
Sa ilawom sa administrasyong Duterte, diin nagsilbi si Piñol gikan sa 2016 hangtod 2019, nakahulam ang gobyerno og P7.2 trilyon sulod sa unom ka tuig nga mas dako pa kay sa gihiusa nga kantidad sa utang sukad pa sa panahon ni Pangulong Manuel Quezon hangtod kang Pangulong Benigno Aquino III, o kapin siyam ka dekada. Gisundan kini sa pamahayag ni Presidential Adviser on Poverty Alleviation Larry Gadon, nga mibutyag nga ang dako nga bahin sa kasamtangang utang sa nasud resulta sa mga gipangutang panahon sa pandemya, ilawom gihapon sa nakalabay nga administrasyon.
