DAVAO CITY – Gipangunahan ni Public Safety and Security Command Center kun (PSSCC) deputy head Angel Sumagaysay ang usa ka polio prevention forum kung diin gitambungan kini sa mga nanag-iya og mga resorts ug hotels lakip na ang mga opisyal sa coastal communities.
Gawas niini, giimbitahan sab sa maong forum ang mga kapitan sa barangay, Environmental Management Bureau of the Department of Environment and Natural Resources, Department of Health XI, mga barangay lakip na sab ang Cultural Communities Affairs Development sa City Mayor’s Office.
Subay niini, gipasalig ni Sumagaysay nga duna silay monitoring sa pang-adlaw-adlaw nga kalihukan sa lungsod ilabi na kung adunay kalambigitan sa seguridad ug kaluwasan sa mga lumulupyo niini.
Dugang pa niya nga ila gilayong isumite sa opisina sa mayor ang ilang mga report matag adlaw.
Nanawagan sab si Sumagaysay ngadto sa mga kapitan sa barangay nga suportahan ang City Health Office (CHO) ug Department of Health (DOH) gumikan ang mga barangay officials gayud ang mga frontliners.
Matud pa ni Sumagaysay nga ang mga barangay officials ang manguna sa pagpakatag sa mga pahimangno ngadto sa ilang komunidad nga ginsakpan.
Ang maong forum ang maghatag kanila og saktong kahibalo arun sa pagtubag sa mga pangutana sa ilang mga ginsakpan ilabi na sa mga komunidad nga anaa haduol sa baybayon.
Ang mga opisyales sa barangay mahimong magpatawag og meeting o pakigsulti sa ilang mga ginsakpan aron mahatagan sila og ensaktong impormasyon labot sa paglikay sa sakit nga polio ilabi na sa mga adunay anak nga singko anyos paubos ang pangidaron nga maoy nabutang sa dakong resgo sa nasangpit nga virus.
