DAVAO CITY- Mukabat sa kapin tres mil ka mga security personnel ang ipakatag alang sa gikahinamang bag-ong aktibidad sa dakbayan nga mao ang Duaw Dabaw 2024.
Ang maong kalihukan ang ginalauman sa lokal nga panggamhanan nga adunay 200,000 ka mga bisita nga buot mo saksi sa labing una nga “Duaw Dabaw Festival” diin pagasugdan kini karong umaabot nga Hunyo 21 og matapos kini sa Hunyo 30 ning tuiga.
Pagbutyag ni Angel Sumagaysay ang Head sa Public Safety and Security Office kon PSSO nga alang sa Duaw Dabaw 2024, adunay kinatibuk-ang ihap nga 3,224 nga ideploy nga security personnel aron mosiguro nga mamahimong hapsay ang maong aktibidad.
Ang nahisgutang ihap ang gilangkuban sa 592 personnels gikan sa Davao City Police Office, 994 personnels gikan sa Task Force Davao, 344 personnels gikan sa City Transport and Traffic Management Office, 155 personnels gikan sa City Disaster Risk Reduction and Management Office ug personahe sa 911, 610 personnels gikan sa Civil Security Unit, 56 personnels gikan sa National Intelligence Coordinating Agency XI, 108 personnels gikan sa Bureau of Fire Protection, 225 personnels gikan sa City Environment and Natural Resources Office ug 140 personnels gikan sa Public Safety and Security Office.
Ang maong mga security personnel ang ipangdeploy ngadto sa mga lugar kon diin ipatigayon ang mga aktbidades susama na lamang sa Rizal Park, Davao City Recreational Gym, USEP Gym, Roxas Avenue ug San Pedro Square.
Sumala pa ni Sumagaysay nga matag adlaw sa maong aktbidad adunay 460 nga ihap sa personahe nga maoy mahulog nga average deployment.
Pagbutyag pa niini nga tulo ka higayon ng nakabuhat og coordination meeting ang maong mga security personnel mahitungod sa safety and security samtang karong adlawa gikatakda silang magbuhat og Executive Committe kon ExeCom Meeting diin ipresenta na niini ang pinal nga safety and security plan atubangan sa mga committee.
via || DMA
