DAVAO CITY – Gitino ni Public Safety and Security Command Center (PSSCC) head Angel Sumagaysay nga hugtanon nila nga ipatuman ang No Jacket Policy sa higayon nga moadto sa mga dagkong event nga kabahin sa kasaulogan sa Kadayawan sa Davao 2019.
Apan gitino sa opisyal nga wala kini nagpasabot nga dili na mamahimong mosuot ug jacket ang usa ka indibidwal inay buot lamang sa otoridad nga hubuon kini sa higayon nga mosulod sa lugar diin adunay gipahigayon nga mga aktibidad kini aron nga masiguro ang kaluwasan sa katawhan.
Kahinumduman nga pipila sa mga terorista ilabi na ang mga suicide bomber, mosuot ug mga jacket aron didto itago ang ilang dala nga bomba hinungdan nga kinahanglan ipatuman sa otoridad ang maong sugyot ilabi na nga laoman sab ang pagdagsa sa mga turista ug bisita.
Gawas sa No Jacket policy, ipatuman sab sa otoridad ang back pack policy ug idili ang pagdala-dala ug mga canister o botelya sa tubig nga dili transparent sanglit mamahimo sab kini nga gamiton sa mga dautan nga elemento aron nga sudlan ug ekplosibo.
Gitataw ni Sumagaysay nga dili disturbo ang No Jacket Policy ilabi na nga dali lamang kini nga hubuon.
