DAVAO CITY – Gipasalig sa Davao City Public Safety and Security Command Center (PSSCC) nga mihimo na sila og contingency plan sa higayon nga makasulod sa siyudad ang bag-ong virus nga gikan sa China.
Sumala pa kang PSSCC head Angel Sumagaysay nga nakigtigom na sila sa mga hingtungdan nga ahensiya aron nga momugna og mga sumbanan aron nga malikayan ang pagsulod sa infected person nga nagdala sa misteryoso nga sakit.
Pipila sa nahisgutan nga mga ahensiya ang gilangkuban sa Civil Aviation Authority of the Philippines (CAAP), Department of Health (DOH), Davao City Health Office (CHO) ug representante gikan sa kadumalahan sa nagkadaiyang airline companies.
Dugang sa opisyal nga istrikto sab karon ang monitoring sa Francisco Bangoy International Airport (Davao Airport) ilabi na kadtong gikan sa mga nasud nga apektado sa corona virus.
Aduna sab sumala pay protocols nga tumanon sa higayon nga adunay makitang sintomas sa mga indibidwal o pasahero sama sa pagdala niini sa Southern Philippines Medical Center (SPMC).
Gawas sa airport, gimonitor sab nila ang seaports ug tulo ka mga checkpoints ning siyudad.
