Giangkon sa Philippine Statistics Authority (PSA) nga dili igo ang pagpuno sa gikinahanglan nga inadlaw nga nutrisyon sa ilang gitakdang threshold aron ang usa ka indibidwal dili makonsiderar nga food poor.
Kini human nitaho ang NEDA sa hearing sa Senado nga ang usa ka indibidwal dili makonsiderar nga food poor kon aduna siyay P64 daily budget sa pagkaon o anaa sa P9,581 monthly food budget alang sa pamilya nga adunay lima ka miyembro.
Ang National Statistician nga si Claire Dennis Mapa nipasabot nga ang maong threshold sa pagkaon gibase sa sample food bundles nga giandam sa mga nutritionist nga naglangkob sa pagkaon alang sa pamahaw, paniudto, panihapon ug snacks nga naghatag ug basic nutrition.Diin base sa per capita food threshold data gikan sa PSA, ang sample food bundle makahatag ug 100% energy, 123% protein, 119% calcium, 80% iron, 131% Vitamin A, 88% Thiamin, 80% Riboflavin, 249% niacin, ug 106% Vitamin C.
Sa pagkakaron, sumala sa hepe sa PSA, gitun-an sa ahensya ang methodology sa pag-ugmad sa updated food poverty threshold nga mohaum sa mga kausaban sa galastuhan sa pamilya, kita ug inflation.
